Rue de Net kom nýverið inn í innleiðingarverkefni hjá Eimskip sem var þegar komið vel af stað. Verkefnið var ekki að taka yfir ferlið heldur að styrkja innleiðinguna þar sem hún skiptir mestu máli: hjá fólkinu sem notar kerfið daglega. Hlutverk okkar var skýrt:  að vera til staðar fyrir fyrirspurnir og veita aðstoð þar sem hennar var þörf. Með samstarf, traust og góða upplifun notenda að leiðarljósi var markmiðið að tryggja að breytingin yrði ekki bara tæknilega rétt, heldur raunverulega nothæf í daglegu starfi.

Ráðgjafar okkar, Anna og Caroline, komu inn með stuttum fyrirvara og voru til halds og trausts í fyrstu skrefunum fyrir og eftir uppfærslu. Með skýrum samskiptum og aðgengilegri aðstoð studdu þær teymi Eimskips við að fóta sig í nýju umhverfi og takast á við þær spurningar sem óhjákvæmilega koma upp þegar nýtt vinnulag og breytingar á kerfi eru innleiddar.

Innleiðing snýst um upplifun fólks

Reynslan sýnir að jafnvel bestu kerfi skila litlu virði ef notendur upplifa óöryggi, skort á stuðningi eða óljósa ferla. Raunverulegur árangur innleiðingar ræðst af því hvernig fólk sem vinnur með kerfið daglega upplifir breytinguna:

• fær það svigrúm til að spyrja?
• fær það að prófa sig áfram?
• er aðstoð aðgengileg þegar á reynir?
• finnur það að tekið sé tillit til daglegra þarfa?

Góð notendaupplifun verður ekki til við tæknilega uppfærslu einni saman. Hún mótast í samtölunum í kringum uppfærsluna: þegar spurning fær skýrt svar á mannamáli, þegar aðstoð er innan seilingar og þegar fólk finnur að það er hlustað á það. Þar liggur munurinn á kerfi sem er "komið í gang" og lausn sem raunverulega styður við vinnuna.

Þess vegna leggur Rue de Net áherslu á að vera virkur þátttakandi í innleiðingu, jafnvel þegar verkefni er þegar hafið. Í þessu tilviki hjá Eimskip fólst aðstoðin í því að svara fyrirspurnum, styðja við dagleg verkefni og vinna náið með starfsfólki Eimskips að því að tryggja örugga og jákvæða upplifun af kerfinu. Markmiðið var að styrkja notendur í breytingunni, svo ný lausn nýtist sem skyldi og verði raunverulegt verkfæri í starfi, ekki hindrun.

Góð samvinna skilar sér

Innleiðingin gekk afar vel og viðbrögðin hafa verið mjög jákvæð. Verkefnið undirstrikar það sem við hjá Rue de net trúum á: þegar traust, nærvera og skýr samskipti eru til staðar, þá verður innleiðing ekki bara tæknileg breyting, heldur mannleg og árangursrík umbreyting.

Svona verkefni minna okkur á mikilvægi þess að vera aðgengileg, vinna með fólki þar sem það er statt og styðja við innleiðingu nýrra lausna í takt við raunverulegar þarfir notenda, því þar skapast virðið til lengri tíma.